Cois Fharraige: An Scéal is Nuaí

28 Meán Fómhair 2022


Féile Chois Fharraige 2022

Ceoltóirí Óga Chois Fharraige

Ceoltóirí Óga Chois Fharraige

Ceiliúradh ar Chois Fharraige téama Fhéile Chois Fharraige 2022. Beidh an fhéile ag tosaí ar an Máirt seo chugainn, 4 Deireadh Fómhair, agus ag dul ar aghaidh go dtí an Domhnach, 9 Deireadh Fómhair. Mar chuid den fhéile déanfar Plean Teanga Chois Fharraige a sheoladh go foirmeálta, nuair a bheas an tAire Stáit don Ghaeltacht, Jack Chambers TD, ar chuairt i gCois Fharraige ar an Aoine, 7 Deireadh Fómhair.

Tá neart imeachtaí ar an gclár: imeachtaí faoi dhíon agus amuigh faoin aer do chuile aoisghrúpa agus ag freastal ar spéiseanna iomadúla an phobail.

  • Ceolchoirm le teaghlaigh Chois Fharraige i Seanscoil Sailearna ar an Satharn, an 8ú lá.
  • Teacht le chéile ag Club Foghlaimeoirí Chois Fharraige, Tigh Chualáin ar an Máirt, an 4ú lá.
  • Plé ar an leabhar ‘Súil an Daill’ le Darach Ó Scolaí le Club Leabhar Chois Fharraige ar an Aoine, an 7ú lá.
  • Taispeántas ealaíne in oifigí Chomhlacht Forbartha an Spidéil ón gCéadaoin, an 5ú lá.
  • Céilí leis an mbanna céilí COGAR, Tigh Chualáin ar an Domhnach, an 9ú lá.
  • Beidh siúlóidí cois cladaigh ann, le treoraithe do theaghlaigh leis an muireolaí, Macdara Ó Cuaig, ar an Satharn, an 8ú lá.
  • Siúlóid do dhaoine fásta le hEoin Ó Tuairisg ar an Domhnach.
  • Spáinfear an scannán ‘An Cailín Ciúin’ i Seanscoil Sailearna ar an Déardaoin, an 6ú lá, agus do na hiar-bhunscoileanna ar an Aoine, an 7ú lá.
  • Tráth na gCeist agus taispeántas cócaireachta le hábhair áitiúla ann.
  • Taispeántas faoin údar Cathal Ó Sandair, fear a thugadh cuairteanna ar Chois Fharraige fadó.
  • Ceiliúradh ar Chaitlín Maude, iarscoláire de chuid Choláiste Chroí Mhuire, An Spidéal, a bhásaigh dhá scór bliain ó shin i mbliana.

Tá an t-eolas ar fad ar an gclár atá le fáil sna siopaí agus i ngnólachtaí áitiúla.

Is féidir glaoch ar Khatie Ní Loingsigh, 083-0106294, nó ar Aoife Ní Chonghaile, 086-0655520, le ticéid a chur in áirithe nó le breis eolas a fháil.


Cathal Ó Sándair

Mar chuid de Fhéile Chois Fharraige, agus mar chuid den chomóradh ar an scríbhneoir Cathal Ó Sándair (1922 – 1996) beidh oíche áirneáin á reáchtáil ar an Máirt seo chugainn, 4 Deireadh Fómhair, sa bPOTA Café ar an Tulaigh, ag tosú ag 7pm.

Faoi stiúir Ghormfhlaith Ní Thuairisg pléifidh Joe Ó Sándair, Seán Ó Neachtain, an Dr. Róisín Ní Mhulláin agus an Dr. Róisín Adams saol, saothar agus oidhreacht an scríbhneora, maraon lena cheangal le Cois Fharraige. Cuirfear soláistí ar fáil.

Le comóradh a dhéanamh ar Chathal Ó Sándair beidh taispeántas póstaer ar a shaol is a shaothar le feiceáil sa bPota Caifé i gcaitheamh an fhéile, ón Máirt seo chugainn go dtí an Satharn, 8ú Deireadh Fómhair.

Tuilleadh eolais faoi Chathal Ó Sándair anseo: http://www.cathalosandair.com/


Club na bhFoghlaimeoirí

Mar chuid de chlár imeachtaí Fhéile Chois Fharraige, beidh suíomh idirlín nua á sheoladh ag Club Foghlaimeoirí Gaeilge Chois Fharraige ag ócáid i dTigh Chualáin, Coill Rua, ar an Máirt, 4 Deireadh Fómhair, ag 8.30 i.n. Tá saorchead isteach ann agus beidh fáilte roimh chách. Beidh seisiún breá ceoil ann mar chuid de oíche oscailte na féile.

Seo cuid de na ceoltóirí is na fonnadóirí a bheas ag casadh: Ríona Ní Chonbhuí, consairtín; Ruairí Mac Con Iomaire, giotár, feadóg stáin, amhráin; Joe Mac Donnacha, amhráin; Fearghas Mac Lochlainn, bodhrán, amhráin; Constance Patten, fidil agus Martina Goggin, amhráin.


Deireadh le Aifreann an Domhnaigh

Aifreann deire ag Ath Clement

Aifreann á chomhcheiliúradh don uair dheireanach i Séipéal an Chnoic, ar an Domhnach seo caite.

Ar an altóir tá, ó chlé, An tAthair Hughie Loftus, An tAthair Clement Mac Mánais agus an tAthair Stiofán Ó Donnchadha.

[Pictiúr: Johanna Ní Mháille]

Ar an Domhnach seo caite dúradh Aifreann an Domhnaigh don uair dheireanach i Séipéal an Chnoic, go ceann píosa. Ó d’éirigh an tAth Ó Raghallaigh as an t-am seo anuraidh tá Paróiste An Chnoic/Na Tulaí faoi shagart Na Ceathrú Rua, an tAth Hughie Loftus. Le bliain anuas bhí an tAth Clement Mac Mánais ag feidhmiú mar shagart cúnta ar an gCnoc. ach tá sé anois á aistriú go Béal Feirste.

Comhcheiliúradh Aifreann an Domhnaigh ar an gCnoc, leis an tAthair Stiofán Ó Donnchú agus an tAthair Hughie Loftus in éindí ar an altóir leis an Athair Clement. Théis an Aifrinn cuireadh tae agus sólaistí ar fáil don phobal sa seomra ar chúl an tséipéil.

Sa mbileog Aifrinn ar an Domhnach seo caite ghlac an tAthair Hughie Loftus buíochas leis an Athair Clement, sagart a bhaineann le Ord an tSlánaitheora. Dúirt sé faoi go raibh ‘bealach deas leis ag castáil le sean agus óg’ agus go raibh ‘focal dearfach aige i gcónaí’. Ghuigh sé chuile bheannacht air i mBéal Feirste, áit a mbeidh sé lonnaithe i Mainistir Chluain Aird.


Cluichí Peile an Deireadh Seachtaine

Rónan Mac Donncha leis an bPeil

Níor éirigh le foireann peile Chumann Micheál Breathnach sa mbabhta ceathrúcheannais de Chraobh an Chontae (Idirmheánach), i Staid an Phiarsaigh ar an Satharn seo caite agus iad ag imirt in aghaidh Oileáin Árann. Buaileadh peileadóirí Chois Fharraige le cúilín amháin, théis dóibh a bheith chun cinn ar Oileáin Árann don chuid is mó den dara leath. Ach scóráil Peter Ó Donnchadha cúl sa 59ú nóiméad, a d’fhág na hoileánaigh dhá chúilín chun cinn. Cé gur scóráil Cillian Ó Curraoin cúilín in am gortaithe do Na Breathnaigh, bhí Oileáin Árann cúilín chun cinn nuair a séideadh an fheadóg.

Mar thoradh ar an gcluiche beidh Oileáin Árann ag dul san iomaíocht in aghaidh Kilconly sa gcluiche leathcheannais an deireadh seachtaine seo chugainn.

Ar an taobh eile den scéal, d’éirigh leis An Spidéal an cluiche in aghaidh Uachtar Ard a bhuachan ar an Domhnach i Staid an Phiarsaigh, a chiallaíonn gur Uachtar Ard a chríochnaigh ag bun an tábla. Bhí Uachtar Ard chun cinn don chuid is mó den chluiche. Bhíodar seacht gcúilín chun tosaigh leathbhealach tríd an dara leath. Ach idir sin agus deireadh an chluiche scóráil An Spidéal dhá chúl agus dhá chúilín: Cillian Ó Laoi a scóráil cúl agus 53 nóiméad caite; a dheartháir Antaine a scóráil an cúl eile in am gortaithe leis An Spidéal a chur chun cinn ar Uachtar Ard ar an tábla.

Fágann sin go bhfuil réamhchluiche dícháilithe le imirt ag An Spidéal in aghaidh St James, agus má éiríonn leo an bua a fháil sa gcluiche sin, coinneoidh siad an stádas sinsearach. Má chailleann siad beidh An Spidéal ag imirt i Round Robin le trí fhoireann eile agus beidh péire acu sin á ísliú go Idirmheánach don chéad bhliain eile.

An Sciath á bhronnadh ag Ciara Moran ó Bhord na Gaillimhe (Peil na mBan) ar Chaoimhe Ní Ghloinn, captaen ar fhoireann Micheál Breathnach faoi 14.

D’éirigh leo an bua a fháil i gCluiche Ceannais an Chontae ar an Satharn seo caite, nuair a chas cailíní na Gaeltachta ar St Furseys, Áth Chinn.

[Pictiúr: Mike Bhaba Ó Conghaile]


Club Scannán ar Ais

Postaer Fómhair 2022 Liosta scannán

An Déardaoin seo, 29 Meán Fómhair, tá Club Scannán Sailearna ag tosaí ar ais le séasúr nua scannán. Idir sin agus an Nollaig taispeánfar deich scannán ó thíortha éagsúla sa tSeanscoil, dhá scannán Gaeilge ina measc.

LA BELLE EPOQUE, scannán barrúil ón Fhrainc, a bhéas á thaispeáint anocht sa Seanscoil ag tosaí ag 8.15pm.

An Déardaoin seo chugainn, 6 Deireadh Fómhair, taispeánfar AN CAILÍN CIÚIN ar an Déardaoin, le linn FÉILE CHOIS FHARRAIGE. 

Tá eolas faoi na scannáin a bheas á dtaispeáint idir seo agus an Nollaig le fáil ar an suíomh WWW.CLUBSCANNAN.IE, chomh maith le treoracha maidir le ballraíocht a chlárú ar líne, nó ticéad a cheannach do scannán roimh ré. Beidh ticéid á ndíol ar an doras chomh maith. €35 an táille ballraíochta a thugann cead isteach don deich scannán a thaispeánfar idir seo agus an Nollaig, nó is féidir ticéad do scannán amháin a fháil ar €8.


Fadhb leis an Uisce

Uisce á Líonadh 2022

Uisce á líonadh ón dabhach atá feistithe ag Séipéal an Chnoic, Indreabhán, socrú atá déanta mar go bhfuil an t-uisce i gcóras uisce An Spidéil contúirteach le n-ól faoi láthair, de bharr an iomarca mangainéis san uisce.

[Pictiúr: Donncha Ó hÉallaithe]

Agus seo á scríobh níl aon scéal fós ann faoin uair a mbeidh sé sábháilte do dhaoine i gCois Fharraige uisce ó chóras uisce An Spidéil a ól. Os cionn seachtaine ó shin fógraíodh go raibh an iomarca mangainéis san uisce ag tíocht ó Scéim an Spidéil agus comhairlíodh do dhaoine i gCois Fharraige gan an t-uisce a ól, ná a úsáid i gcócaireacht ná le fiacla a ní. Beagnach 6,000 teach atá buailte ag an truailliú sa gcóras uisce.

Tá daoine ag braith ar an soláthar uisce atá á chur ar fáil ó dhabhachanna atá feistithe ag Séipéal an Chnoic agus ag Seanchéibh An Spidéil, chomh maith le áiteacha eile. Ach ní mhór an t-uisce ó na dabhachanna, atá curtha ar fáil, a fhiuchadh le go mbeidh sé sábháilte le n-ól.


Cosán na Naomh

Stiúidió Chois Chuain

Stiúideo Cuan sa Spidéal

An tseachtain seo tá saothar nua ceoil leis an gcumadóir agus an bhfidléir Máire Breatnach á chur ar stáitse sa Spidéal ag Stiúideo Cuan, ag críochnú ar an Satharn, 1 Deire Fómhair. Chomh maith leis an veidhlín, bheidh an vióla á sheinm ag an gcumadóir Máire Breatnach agus in éindí léi beidh Mick O’Brien ar feadóga agus na píb uileann, chomh maith le Noreen O’Donoghue ar an gcláirseach.

Tosaíonn sé chuile oíche ag 8.30pm. Is féidir níos mó eolais a fháil ach teagmháil a dhéanamh le Stiúideo Cuan ag an uimhir 091 553838, nó ticéad a cheannach ar Eventbrite ach ‘Cosán na Naomh’ a chuardach ar an suíomh.


Torthaí Spóirt na Seachtaine

Peil (Sinsear): An Spidéal 2 – 08, Oughterard 3 – 04

Peil (Idirmheánach): Ml. Breathnach 0 – 17, Árann 1 – 15.

Peil (faoi 19B): An Spidéal 3 – 16, Oughterard 3 – 10.

Peil (faoi 17B): An Spidéal 8 – 11, Clifden 1 – 10.

Peil (Cailíní faoi 14): Ml. Breathnach 2 – 12, St Furseys 3 – 06.

Iomáint (faoi 14B1): Ml. Breathnach 1– 05, Mullagh/Kiltormer 3 – 05.

Sacar (Roinn 1): Cois Fharraige 6, Athenry B 1.

Sacar (Roinn 1): Mac Dara 1, Moyne Villa 1.

Sacar (faoi 21): Bearna/Na Forbacha 4, Tuam Celtic 1.

Sacar (faoi 17): Bearna/Na Forbacha 5, Moyne Villa 3.

Sacar (faoi 15): Bearna/Na Forbacha 0, Maree/Oranmore 4.

Sacar (faoi 15): Mac Dara 5, Moyne Villa B 0.

Sacar (faoi 14): Mac Dara 2, Bearna/Na Forbacha B 1.

Sacar (Cailíní faoi 13): Bearna/Na Forbacha 2, Loughrea 4.

Sacar (faoi 13): Bearna/Na Forbacha 0, Corofin 5.


Nótaí Chois Fharraige

Cumann Forbartha Chois Fharraige a cuireann Nótaí Chois Fharraige le chéile chuile sheachtain don Churadh Chonnachta, a thagann amach gach Déardaoin. Fáilteofar roimh mhíreanna nuachta, pictiúirí nó eolas faoi imeachtaí, le foilsiú sa gcolún ach iad a sheoladh i bhfoirm leictreonach chuig notaicoisfharraige@nullgmail.com ar an Luan roimhré faoi 2.30pm. Is féidir an colún a léamh chomh maith ar an suíomh seo le ábhar breise.