Cartlann Nuachta: 2 Feabhra 2022

Ceiliúradh ar Lá ‘le Bríde

Cailín amháin ó gach rang i Scoil Sailearna agus iad ina seasamh taobh leis an íomhá de Naomh Bríd, le ceiliúradh a dhéanamh ar Lá ‘le Bríde, an tseachtain seo:

Ar chúl, ó chlé: Clíodhna Ní Neachtain, Ainnir Ní Choisdealbha, Kiera Ní Dhunaird, Éabha Ní Fhátharta, Aoibhe Ní Mháille agus Caitríona Ní Fhiannachta (Príomhoide na Scoile).

Chun tosaigh, ó chlé: Emma Ní Shiadhail, Orla Hoban, Liadan Nic Airt.

Sé an t-ealaíontóir Dara Mac Aoidh a rinne an íomhá de Naomh Bríd.

Calaphort Ros a’ Mhíl

Radharc ar an gCalaphort Iascaigh i Ros a’ Mhíl.

[Pic: Máire Áine Nic Dhonncha]

Dea-scéal do Chonamara Theas, gur fhógair Aire na Mara, Charlie McConlogue TD, go bhfuil cinneadh tógtha ag an rialtas dul ar aghaidh le calaphort domhan-mhara a fhorbairt i Ros a’ Mhíl. Aithnítear anois go bhféadfadh Ros a’ Mhíl a bheith oiriúnach le forbairt mar lár-ionad chun tacú le tionscal na gaoithe amach ón gcósta agus go bhféadfaí na céadta post a chruthú sa gceantar le freastal ar an earnáil.

Tá roinnt buntáistí ag baint le Ros a’ Mhíl, thar aon chalaphort eile: tá cead pleanála ann cheana leis an gcalaphort a fhorbairt; tá banc talún thart ar an gcalaphort in úinéireacht an stáit agus tá Ros a’ Mhíl gar don fheilm mhór gaoithe atá le forbairt amach ó na Sceirde.

Tá creidiúint mhór ag dul don choiste beag atá ag brú cás Ros a’ Mhíl le breis is scór bliain anois, Máirtín Mhaidhc Ó Conghaile agus Cathal Groonell go speisialta. Ag caint dhó ar Raidió na Gaeltachta ar an Máirt seo caite, dúirt an Teachta Éamon Ó Cuív go raibh sé tábhachtach anois nach mbeadh aon mhoilleadóireacht ann, mar táthar le úsáid a bhaint as an gcead pleanála atá ann faoi láthair chun an calaphort a fhorbairt, a bheas rite amach an bhliain seo chugainn.

Éacht Déanta ag an Scoil Chuimsitheach

Foireann díospóireachta ó Choláiste Chroí Mhuire, An Spidéal, ar éirigh leo fáil tríd go dtí an babhta ceannais de Chomórtas Díospóireachta Uí Chadhain, a reáchtálann Gael Linn. Cé nár éirigh leo, bronnadh teastas agus dearbhán €250 orthu.

Sa bpictiúr, ó chlé: Pádraic Ó Ciardha (Cathaoirleach, Gael Linn); Tríona Uí Mhurchú (Príomhoide Choláiste Chroí Mhuire, An Spidéal); Oisín Ó Coisdealbha, Cainnear Nic Réamoinn agus Éadaoin Nic Dhonncha (foireann díospóireachta Choláiste Chroí Mhuire); Eimear Ní Chonaola (Nuacht TnaG, aoichainteoir).

[Pictiúr: Seán Ó Mainnín]

Tá éacht déanta arís ag foirne díospóireachta ón Scoil Chuimsitheach sa gCeathrú Rua. Ar an Luan seo caite in Áth Luan, bhí an bua ag an dá fhoireann díospóireachta – Sinsear agus Sóisear – i gComórtas Díospóireachta Uí Chadhain, a eagraíonn Gael Linn.

Sa gCraobh Shóisearach phléigh na foirne an rún ‘Ba cheart dúinn á gcuid laethanta saoire a chaitheamh in Éirinn in 2022’. Sa gCraobh Shinsearach sé an rún a bhí faoi chaibidil acu ná ‘Tá éacht déanta ag teilifís RTÉ le 60 bliain anuas’.

Seo thíos na foirne ón Scoil Chuimsitheach ar éirigh leo an comórtas a bhuachan:

Sóisear: Caoimhe Ní Chuinn, Éabha Ní Choisdealbha agus Neans Nic Dhonncha.

Sinsear: Mikayla Ní Chuanaigh, Ailbhe Ní Mhurchú agus Aedín Ní Mháille.

Bronnadh buanchorn agus dearbháin de luach €1,000 ar an bhfoireann bhuacach sa dá roinn den chomórtas, agus bronnadh dearbháin de luach €250 ar an bhfoireann sinsear ó Choláiste Chroí Mhuire ón Spidéal a bhí páirteach sa gcraobh chomórtas ar an Luan chomh maith, tar éis dóibh fáil tríd do dtí an babhta craoibhe.

Club Scannán Sailearna

Cuirfear tús an Déardaoin beag seo, 3 Feabhra, le sraith eile scannán i Seanscoil Sailearna, eagraithe ag Club Scannán Sailearna. Gach Déardaoin, seachas Lá ‘le Pádraig, idir seo agus an Cháisc beidh scannán le fotheidil á thaispeáint ar an scáileán mór san Amharclann i Seanscoil Sailearna, ag tosú ag 8.15pm.

Deich scannán ar fad atá ar an gclár don séasúr, ag tosú an tseachtain seo le scannán ón Danmhairg, ANOTHER ROUND.

Tá córas simplí ann le clárú don séasúr nó le ticéad a cheannach d’aon cheann de na scannáin a bheas á thaispeáint, ach dul ag an suíomh WWW.CLUBSCANNAN.IE agus na treoracha a leanacht. Faigheann Club Scannán Sailearna maoiniú ó Chomhairle Chontae na Gaillimhe faoi na Scéimeanna Tacaíochta Pobail.

Cártaí sna Forbacha

Anois go bhfuil srianta Covid maolaithe ag an rialtas tá roinnt imeachtaí nach bhféadfaí a eagrú le beagnach dhá bliain anuas á dtosú ar ais.

Tá tús curtha le Cluiche Cártaí 25 i Scoil Náisiúnta na bhForbacha ar an gCéadaoin ag 8.00pm á eagrú ag Club Iománaíochta Bearna/Na Forbacha.

Fáilte roimh chách.

Club Leabhar Chois Fharraige

Beidh Club Leabhar Chois Fharraige ag teacht le chéile ar an gCéadaoin, 16 Feabhra, ag 8.00pm i dTigh Mholly, Indreabhán, chun an cnuasach gearrscéalta, RÉ NA bhFATHACH le Colm Ó Ceallacháin a phlé. Beidh blaisíní bia ar fáil ar an oíche ó POTA Café. Le tuilleadh eolais a fháil is féidir scéal a chur chuig clubleabharcf@nullgmail.com.

Bíonn fáilte i gcónaí roimh bhaill nua.

Coláiste Lurgan

Coláiste Lurgan

De réir an méid a bhí le rá ag Bainisteoir Choláiste Lurgan, Micheál Ó Foighil, ar Adhmhaidin (RnaG) an tseachtain seo caite, bhí roinnt cruinnithe dearfacha idir Coláiste Lurgan agus Údarás na Gaeltachta, maidir leis an bhforbairt atá beartaithe a dhéanamh ar shuíomh an choláiste.

Thug sé le fios ar an gclár nach mbeadh Coláiste Lurgan ag glacadh ach le 150 scoláire don chúrsa A i mí Meithimh, ach go mbeadh an gnáth-líon scoláirí ag an gcoláiste le haghaidh cúrsa B agus C, a bheas á reáchtáil i Scoil Sailearna i mbliana.

Comhar Creidmheasa ag Dul Glas

Is gearr go mbeidh Comhar Creidmheasa Cholmcille ag gairm an Chruinniú Cinn Bhliana. De gnáth cuirtear amach leabhrán do na baill sa bpost don Chruinniú Cinn Bhliana. Ach le gearradh anuas ar an lorg carbóin agus le cuidiú leis an timpeallacht, tá an Comhar Creidmheasa ag iarraidh ar na baill glacadh le leagan leictreonach seachas cóip chrua den leabhrán i mbliana. Tá trí dhuais de €100 á chur ar fáil ag an gComhar Creidmheasa do na baill a chuireann in iúl go mbeidís sásta i mbliana le leagan leictreonach. Níl le déanamh ach dul ag suíomh an Chomhar Creidmheasa ag WWW.CCCHOLMCILLE.IE.

Éabha Nic Dhonnacha

Tá Éabha Nic Dhonnacha, iníon le Mary Ellen Ní Chualáin agus Kevin Phetie Mac Donnacha as Ros a’ Mhíl, roghnaithe le bheith ar an Irish National Talent Squad sa rugbaí. Imríonn Éabha a cuid rugbaí le Corinthians na Gaillimhe. Is imreoir peile den scoth í le Cumann Micheál Breathnach chomh maith.

50/50 Scoil Sailearna

Tá 50/50 á eagrú arís i mbliana ag Coiste na dTuismitheoirí, Scoil Sailearna. Beidh deich dtarraingt ar fad ann, ag tosú ar Aoine na seachtaine seo chugainn, 11 Feabhra, agus ag leanacht ar aghaidh gach seachtain in dhiaidh sin go saoire na Cásca.

Le páirt a thógáil ann níl le déanamh ach €20 a chur i gclúdach litreach, le do ainm agus uimhir gutháin ar an gclúdach. Tabharfar uimhir do gach duine a cheannaíonn ticéad agus cuirfear na huimhreacha ar liathróidí beaga le dul sa bpota mór. Le go mbeidh seans níos fearr an duais a bhuachan, is féidir níos mó ná ticéad amháin a cheannach don chrannchur.

Sé an duais a bheas ann gach seachtain ná 50% den airgead atá tagtha isteach don tseachtain sin. Má dhíoltar 500 ticéad beidh €500 ag dul don té leis an uimhir a tharraingítear gach aon seachtain.

Tá sé i gceist ag Coiste na dTuismitheoirí an t-airgead a dhéanfar ón gCrannchur a úsáid ar mhaithe le trealamh a fháil agus le seomra nua a réiteach taobh amuigh, rud a chuirfidh le áiseanna teagaisc na scoile.

Fáil Réidh le SeanÉadaí

Tá deis á thabhairt ag Scoil Sailearna do dhaoine i gCois Fharraige fáil réidh le seanéadaí agus glantachán an earraigh ar bun acu. Tá comhlacht i nGaillimh sásta na héadaí a bhailiú ó Scoil Sailearna le athchúrsáil agus cúpla euro a íoc leis an scoil. Is féidir na seanéadaí a chur i gnáth-mhála dubh agus an mála a fhágáil ag príomhdhoras na scoile ón Aoine seo, 4 Feabhra. Baileofar na málaí dubha éadaí ar an Máirt, 8 Feabhra, ag 11.00am.

Torthaí Spóirt ón Deireadh Seachtaine

Sacar (Roinn I): Cois Fharraige 1, Merlin Woods/Medtronic 1.
Sacar (Roinn I): Mac Dara 0, Mervue Utd. B 0.
Sacar (faoi 18): Bearna/Na Forbacha 1, Mervue Utd. 1.
Sacar (Cailíní faoi 17): Bearna/Na Forbacha 5, Cregmore/Claregalway 0
Sacar (faoi 16): Macdara 2, Corrib Celtic 3.
Sacar (Cailíní faoi 14): Bearna/Na Forbacha 4, Kilshanvey Utd. 4.
Sacar (faoi 14): Mac Dara 3, Corrib Rangers 0.
Sacar (faoi 12): Mac Dara 4, Salthill Devon B 3.
Sacar (faoi 12): Bearna/Na Forbacha 4, Galway Hibs 1.